.




Ich weeß nit!

N'Julidag, - e trop'schi Hitz-
Am Waldrand, in're Wasserpütz
Dhun Buwe, Meedle bade -
Sinn luschdig, wie halt Kinner sinn,
Unn finne do nix unrechts drinn,
Unn's dhut'n aach keen Schade. -

'M Parrer awwer kummt's zu Ohr, -
Der nimmt am neekschde Dag sich vor
Denn, wo zuerscht 'r hott verwischt
Im Dorf - de kleene Franzel Schlicht
Unn secht zu demm in ernschtem Ton:

"Hoscht mit de Meedle, liewer Sohn,
Du geschtern Owend aach gebadt?" -
"Ich weeß nit," meent der deschberad,
"Do misse se 'n ann're frooge,
Mer ware jo all ausgezoge!"





Die Entschuld'gung

"Sie hawwe am Sunndag de Müller verhaue,-
Deß iß schtroofbar, deß iß nit erlaabt!"-
So sescht dr Richter, mit finschtere Braue,
Zu zwee Schtrolche, zwee altersgraue,
Wo mit Händ wie'n Kerchdhorn begabt.-
"Was hawwe se zu ihrer Entschuld'gung zu sage?"-
"Daß mer'n 's neekschtmool am Werkdag verschlage!"




.